advertisement

一向鍾情歷史建築研究的張敬軒,除了先後開設錄音室、接手香港歷史悠久的雅旺錄音室並保育大量珍貴母帶;以及重塑1960年代盛極一時的全港首間旋轉餐廳「仙后餐廳」之外,近日更踩入婚禮界開婚紗店Sennet Frères。這間並非一般的婚紗店,而是跟軒仔現居的百年大宅「白色莊園Alberose」原主人威爾家族有關。疫情兼逆市下進駐銅鑼灣黃金地段羅素街,點解咁有膽色?軒仔更分享如何解決準新人的矛盾,大爆有情侶揀婚紗嘈交不歡而散的經歷;以及教你揀輕婚紗的重點!

近年居於Alberose的張敬軒,自搬進這所香港大學轄下的二級歷史建築後,便開展對威爾家族的歷史研究,除了對大宅作出保育及修繕工作外,他更遠赴巴黎、倫敦等地為家族歷史作資料蒐集,獲得多份重要文獻及文物。

開展對威爾家族的歷史研究

2019年初,年屆80歲的威爾家族第三代後人Molly O’dell女士在保育組織「活現香港」的邀請下重遊故地Alberose,並結識張敬軒,二人交談下燃起將Sennet Frères品牌重組的想法,希望延續百年品牌故事並以全新形象重現人前,最後決定業務改以婚紗、晚裝及珠寶首飾重新啟航。

威爾家族第三代後人Molly O’dell

2020年中,Sennet Frères正式任命張敬軒為常任品牌歷史顧問,邀請設計師Kev Yiu擔任首席創意及設計總監;更邀得婚嫁品牌Alexander Hera成為合作夥伴,打造Sennet Frères高級訂製婚紗禮服品牌,並在銅鑼灣羅素街22號開設概念店。

張敬軒疫市開婚紗店

疫情下大膽創業

從開錄音室到開餐廳到開婚紗店,今次更在疫情下創業,張敬軒為何咁大膽有這個計劃?他說︰「我成日都覺得有危就必有機,如果唔係呢個疫情,我哋又未必有呢個機會在呢個黃金地段開舖。我唔係特別叻去湊一個新品牌,我反而叻去活化一啲舊品牌:無論由我餐廳開始到錄音室,同埋今次Sennet Frères婚紗店,其實都係同一個理念。」

店舖櫥窗設計

單看店舖櫥窗設計,給人高貴華麗及「婚紗很貴」的感覺,對此軒仔表示希望大家不要被門面裝潢嚇親而不敢進入,店內的婚紗其實分為三個系列和級別的價錢,有平亦有貴。他說︰「這是一間概念店,大家可以見到每一件婚紗隔離都有個名牌介紹,其實是一種展覽的方式。另外,這裡會定期舉辦小型婚展,好似婚禮市集咁。」

Sennet Frères店內

創作婚紗背後的故事

開業至今有沒有遇到難忘的顧客?張敬軒立即為編輯講故事︰「我哋做過最感動嘅case係新娘子的媽媽過咗身,她的媽媽生前留低一束頭髮,用一個好靚嘅袋裝住。新娘子要我哋將束頭髮釘在婚紗上。於是我哋釘在婚紗背面,剛好在心臟正後方。在她出嫁當日行禮時,媽媽係陪伴住佢。呢個亦都係我哋品牌嘅精神,希望佢唔單止一件禮服,更加係一份祝福。」

創作婚紗背後的故事

Sennet Frères首季推出以Aimer為主題的2021春夏婚紗及晚裝設計,首席創意及設計總監Kev以威爾家族的成員 Rosie、Susannah和Sophie三位女性各自的性格和真實經歷作為創作藍本,並以三人的名字命名相關系列。春夏系列共有45件全新設計婚紗禮服,以手壓絲花、立體刺繡花飾及布料混搭應用,營造出文藝復興時期的特色。每件禮服從設計到製作都於香港製造,平均耗時120小時以上,每件都好花心思。

張敬軒教揀輕婚紗

張敬軒教揀輕婚紗

踏入2021年,輕婚禮繼續是大趨勢,揀婚紗有甚麼要注意?軒仔說︰「第一個考慮當然係March in,究竟係咪應該著一條有大裙擺嘅婚紗,還是要輕鬆啲嘅小裙擺?今季Kev的新設計中有一年婚紗的裙擺可以拆出嚟,好適合輕婚禮。」

輕婚禮要輕鬆啲嘅小裙擺

「新娘子揀婚紗之前最緊要知道自己的優缺點,你想自己望落去對腳長啲,或者想條腰幼啲,或者膊頭唔好咁橫可以收窄啲,咁就要揀唔同款式。例如有啲女孩子細個經常游水,個膊頭闊啲,咁可以揀一啲本身喺個膊頭位有ruffles嘅款式。」軒仔說有好多方法著起件婚紗,會令到自己在大婚當日給人與別不同的感覺,果然好專業!他補充︰「同埋要知道自己嘅budget先,既然係輕婚禮,我覺得唔需要太鋪張,當然大有大著、小有小著。」

Kev的新設計中有一年婚紗的裙擺可以拆

完美婚紗與完美婚禮

結婚是否一定要著白色婚紗先至完美?張敬軒心目中的完美婚紗是怎樣?他說︰「如果大家係有諗過去為你嘅大日子去揀一件婚紗,最緊要係自己鍾意,同埋你覺得當你著上呢件婚紗之後,無論任何時候睇返都唔會有遺憾,咁嗰件就係一件你應該要擁有嘅婚紗。」

張敬軒心目中的完美婚紗是怎樣

他心目中的完美婚禮又是怎樣?「我覺得其實只要搵到身邊啱嗰個人,就係一個完美嘅婚禮。我覺得婚禮應該好private,好屬於自己嘅。當然係應該要大宴親朋,或者係所有朋友都要嚟見證,不過,所有嘢都應該係自己鍾意的,完美婚禮最重要係自在舒服。」

張敬軒教揀輕婚紗

現時疫情下結婚真的不容易,張敬軒有感而發,希望可以鼓勵一眾準新人,他說︰「在疫情當中,大家每日生活都要面對各種挑戰,工作、經濟環境,甚至乎每一日都要戴住口罩,人同人之間嘅隔膜多咗,對生活的顧慮都多咗;如果你身邊已經有一個你決定願意將一生交托俾佢嘅人,千祈千祈唔好放手,要把握好呢個時間。在覺得有啲渺茫嘅日子入面,如果身邊有一個人會為自己過的話,我相信每一步我們都會行得更加踏實。」

張敬軒有感而發鼓勵一眾準新人

從影片中可以細聽張敬軒特地為shebrides讀者清唱出《找對的人》,他叫大家留意歌詞︰「是對的終於會碰到,是錯的不管再美好,一個接一個,也沒有結果,方知海闊天高。」他解釋︰「如果你已經搵到嘅話就唔好放手,如果你未搵到嘅話亦都唔好心急,因為每一個人在一生只會遇到一個係啱嘅人。我喺呢度都祝各位shebrides嘅朋友早日遇到你嘅心上人,同埋同你嘅心上人永結同心!」好好聽呀,多謝軒仔!

 

店內不定期舉辦婚嫁市集

店內不定期舉辦婚嫁市集

張敬軒提到概念店既是婚紗店,亦是展覽,同時會不定期舉辦市集。為迎接情人節來臨,Sennet Frères及Alexander Hera即將舉辦「婚嫁體驗日2.0」,聯同超過15間友好婚禮界商戶,一連兩日舉辦婚嫁展。成功登記入場將會獲得超過價值$50,000的專享折扣禮遇。由於店內會有人流控制的安排,記得提前預約。立即登記:https://cutt.ly/DjXllMK

【Wedding Showcase 2.0.Be My Valentine】
日期:2021年2月6至7日 (星期六至日)
時間:中午12時至晚8時⠀
地址:香港銅鑼灣羅素街22號Sennet Frères概念店

 

COORDINATION︰Joey Chen
VIDEOGRAPHER︰Keith Au、Jackie Chan
EDITING︰Melody Law
VENUE︰Sennet Frères