男女關係在追求階段，一定是互相遷就、甜甜蜜蜜，願意為對方付出時間、精力和金錢。但當感情穩定下來，雙方關係可能會漸漸失衡，任何一方提出更多要求時，另一方就要加倍付出。 即使你沒有公主病，但亦可能會因為習慣了另一半對你的好，而在不知不覺間變本加厲，提出過份的要求，甚至強迫對方做一些他極不願意的事。
對方當然會因為愛你而為你做，然而時間久了、日積月累的被迫與無奈，結果會令他逃避你。據兩性關係調查發現，以下10件事都是大部分男人最不希望另一半迫自己做的，各位sis，可以避免就盡量避免了。
第一件事︰任何形式的報到
大部分男人都不愛受束縛，想要自由，最怕另一半要求「安全感」，被迫去到邊、做緊乜都要Whatsapp或打電話報到。
第二件事︰隨傳隨到
好果唔單只要報到，仲迫佢要隨傳隨到的話，相信甚少人會受得了，即使你的另一半現在願意，勸你唔好經常咁做，否則佢遲早頂唔順走人！
第三件事︰社交媒體放閃
一般男人都唔太鍾意將私生活公開，但好多女生卻又鍾意放閃曬幸福，有時候自己po相都唔夠，更會迫另一半在社交媒體放閃。
第四件事︰當著朋友前被發號施令
大部分男人都愛面子，即使被公認為「超級好男友」、「最聽話老公」等美名，亦受不了另一半在朋友面前對自己發號施令，甚至指手劃腳呼喝做事。
第五件事︰排隊買限量版
香港人鍾意排隊搶購任何嘢，當中包括各大品牌限量版、人氣產品，甚至排長龍買珍珠奶茶。而不少女生排隊買到手，其實只係為咗影相打卡！事實上，大部分男人就算好想飲或者食某樣嘢，都未必會專登排一個鐘頭隊，唔好迫佢喇！
第六件事︰揸機影相
別以為男人一定鍾意為另一半影沙龍，男人愛攝影，但唔代表樂於揸機為女生影幾十張同一個pose的相，而且影完仲要唔滿意被罵。
第七件事︰陪行街俾意見兼幫拎手袋
女人愛行街，而且一逛就幾個鐘，唔少女生都想男友陪逛兼可以幫手拎嘢同俾意見。其實這是大部分男人的惡夢，相信他們寧願俾張附屬卡任你碌。
第八件事︰當眾鍚鍚或叫「BB」
在公眾場所拍拖時做咩最尷尬？相信10個有9個男人都怕女朋友迫自己「錫錫」，又或者大聲叫「豬豬」、「BB」。
第九件事︰做家務
男人幫手做家務其實好應該，不過就好怕放工返到屋企好累時，另一半不但唔體諒，更喝令自己去掃地吸塵洗碗；其實放假時佢願意做㗎(相信係)。
第十件事︰陪睇韓劇/愛情電影
好多男人都嫌韓劇好婆媽，又唔鍾意狗血愛情劇，其實睇戲的興趣真係人人不同，唔可以迫對方陪自己咁自私㗎，你又會唔會陪佢睇戰爭片呢？
