【輕婚禮】櫻花主題婚禮提案︰必讀專家貼士及新娘妝技巧

全球人類都在面對不知何時才結束的疫情，留在本地舉辦「輕婚禮」將會是大勢所趨。入行17年的婚禮達人Tim Lau表示︰「因為疫情關係，限聚令令到婚禮人數大幅減少，因為咁就產生小型婚禮呢個概念。輕婚禮有兩個意思，第一個係輕鬆、relax，好似去咗外國結婚一樣。第二個係輕便、簡約、simple，整個婚禮流程好簡單唔複雜。」

相比過往大排筵席的傳統婚禮，簡單風格的輕婚禮更受準新人歡迎。輕婚禮會採用較簡約的風格和佈置，整體流程亦較為輕鬆自在。而且相比起傳統酒店場地，不少新人更傾向選擇主題場地或特色餐廳來舉辦輕婚禮。今次由Tim Lau帶大家到科學園一間日式餐廳「花見月YaYoi」睇場，講講輕婚禮。

滿足去日本旅行的願望

Tim Lau︰「因為疫情之下唔可以飛，來到呢間餐廳，配合日式櫻花佈置，大家就好似去咗日本旅行嘅感覺，同親友來一場與眾不同的海外婚禮香港版。加上餐廳走文青風，在big day當日，親戚朋友可以盡情同新人影相，同時亦可以打卡Selfie。」

另外，這間餐廳可以配合不同主題，除了日式和風外，亦可以有歐陸式佈置，準新人可以跟佈置公司商量，炮製一個屬於自己嘅主題。

(櫻花場地佈置︰Leung’s Creations梁品製作）

日式婚宴菜單

花見月YaYoi的廚師曾到日本跟大廚學藝，創作出獨特的日式和風料理。婚宴菜式包括海鮮刺身、汁煮鮑魚、日式豚角煮及白身魚清湯等。主菜可以選擇西京銀雪魚或照燒厚切牛扒，和風料理結合西式元素，變奏成fusion婚禮菜式。

櫻花主題新娘妝

婚禮除了要有漂亮靚場地之外，婚禮的主角當然是新娘子。為配合櫻花主題婚禮，絕對需要一個適合自己嘅漂亮妝容，由資深化妝師ChiChi Wu 分享新娘妝容貼士。ChiChi Wu︰「配合返輕婚禮，新娘子鍾意選擇簡約嘅婚紗。妝容方面建議以透薄自然簡潔為主，底妝有少少霧光感，同時又可以保持光澤亮麗效果。」

「眼妝要有層次感，睫毛要根根分明。場地以櫻花為主題，可以掃上粉嫩色胭脂，望落去就會更甜美可愛。唇妝要有水潤微微透光的效果，令整個妝容有柔和感覺，而且望落去會有想錫的衝動。」

VENUE︰花見月YaYoi

DECORATION︰Leung’s Creations梁品製作

MODEL︰Kaly Chung

MAKEUP & HAIR︰ChiChi Wu

WARDROBE︰Phase Eight、Swarovski

COORDINATION : Joey Chen

VIDEOGRAPHER : Keith Au、Johnny Yau、Jackie Chan

EDITING : Yin Lau

想打造出最完美的輕婚禮，留意shebrides一系列 #輕婚禮 資訊。

延伸閱讀︰【輕婚禮提案】沒有華麗浮誇卻仍很美！2020-21輕婚紗推介（持續更新）