根據「不定期卻很貼地」的民意調查發現，很多女性經常抱怨和男友/老公去旅行時總是令自己生氣，然後對方就會怪責你發脾氣。姊妹們分享跟另一半去旅行的不快經歷時總離不開︰「同佢行街成日摧我走！」、「叫佢影相就求其影！」講到總之同男人去旅行就只有掃興咁。事實上真係咁差咩？大部分男人都唔太鍾意shopping，同女人的興趣亦可能有分別，但男人陪女人去旅行其實都幾責任重大㗎。
男士們，你有冇做過以下幾件事？
女士們，如果你honey做到以下一半已經好好喇！
功能一、拎(重)嘢
無論另一半係咪大隻男，男人幫女人拎嘢都係應有的風度。作為另一半，更加要幫你的女人拎住旅行戰利品，等佢可以輕輕鬆鬆繼續shopping！
功能二、睇地圖
大部分情侶去旅行都選擇自助遊，可以慢慢享受二人世界。不少男人都懶懶閒，未必會在出發前細心地plan行程，通常由女人負責選景點；但抵達目的地時，男人就一定要識得睇地圖，負責帶路（或駕車），現在有Google Map就方便晒喇！
功能三、陪食嘢
除了shopping，去旅行都要吃盡景點的美食。女人通常貪吃但又胃口細，加上要keep fit保持身形；呢個時候，男人就要主動負責清晒枱面的食物！
功能四、自動俾錢
有風度的男人，唔止會幫女人排隊，下一步當然係俾錢喇！無論係女人shopping、買手信，以及飲飲食食。即使你哋係AA制情侶，亦可以預先夾定錢，由男人保管，購物或食飯時女人可以盡情揀盡情食，男人俾錢又有面子！
功能五、排隊
男人唔鍾意shopping唔緊要，最重要係願意幫女人排隊，無論試身室還是付款處，咁就可以慳返好多時間，繼續去逛另一間店舖。盡早逛完的話，男人都可以快啲收工！
功能六、影相
去旅行影相係指定動作，女人一定想留倩影做紀念。男人應該自動自覺幫你的女人影相，兼姐selfie合照喇！即使你唔係攝影大師，亦起碼要識得基本的影相技巧，唔會out focus，同埋一定要影得女人瘦啲，上youtube睇教學片喇！
